向來是廣告界寵兒的陳慧琳（Kelly），昨日在北角出席《蘋果創意廣告大獎2015》頒獎典禮，大會一共頒發23個獎項，表揚一眾廣告精英。Kelly亦在公眾投票下，獲得「蘋民最Like廣告代言人」大獎，恭喜！恭喜！
原來一直都有不少人想搵Kelly一家拍廣告，Kelly坦言：「爹哋唔會畀，唔想佢哋上鏡，唔想佢哋咁高調，因為老公都好低調。」如果只要夫婦兩人拍廣告？Kelly說：「更加冇可能，因為我老公完全唔鍾意上鏡。」不過Kelly老公多次被影到湊仔，他會否很介意？Kelly說：「都會諗吓喺乜嘢位俾人影到，大家會討論吓角度問題，但係佢都明白，佢好少避。」每逢開學日一對囝囝成為被影對象，問老公有否介意？她說：「佢又唔會話好介意，但最好唔好，不過老公都冇投訴，因為大家都明白影吓影吓，就唔會再影。我都有拎過啲相畀佢同囝囝睇，見到自己個樣都冇乜特別反應。」
叫小龍包夠cute
Kelly又大爆大仔劉昇心事說：「反而大仔有問過點解啲人會知道佢叫蝦餃仔，我冇解釋畀佢聽，因為平時我哋唔係咁嗌，細個叫就得意，大個咗就唔好咁嗌，大個好Man㗎嘛，最好大家叫番佢個名。」咁細仔劉琛又知否自己叫小龍包，Kelly表示：「佢知道！𠵱家佢仲細，OK嘅，好似好cute咁。」
另外，Kelly早前上雷頌德老婆梁家玉（Jade）的飲食節目，不過有人指似清談節目多過飲食節目，Kelly說：「在我嚟講冇所謂，我都係幫佢，但係我怕Jade唔開心，佢擺咗咁多心機落去，佢煮嘢食好勁。」Kelly笑稱回家有與囝囝一齊整cup cake，不過爆囝囝鍾意食cup cake上的裝飾。
採訪：羅慧敏
攝影：陳志嵐
