冬季流感高峯期快殺埋身，查實政府新一輪流感疫苗注射計劃，本月中已開始，但本港醫護人員嘅注射率一直唔高。
食衞局局長高永文噚日就聯同多個公營醫療機構高層，包括食衞局常任秘書長袁銘輝、醫管局主席梁智仁同行政總裁梁栢賢，以及衞生署署長陳漢儀等，齊齊晒冷打針，鼓勵醫護人員響應。被問到會唔會強制注射，民望高就話醫管局未有共識。
民望高噚日落咗觀塘社區健康中心視察市民嘅注射情況，佢話去年流感病發、死亡數字都比較嚴重，所以今年政府疫苗計劃額外買多10多萬劑流感疫苗，令更多人受惠。而今年冬季流感疫苗保護率高達60%至80%，希望鼓勵多啲人打針，減低流感爆發。