特首梁振英突然「大躍進」，趕上歷史其實已經好悠久嘅facebook潮流，日日同大家調理農務，但暫時唔見好多人讚好，反而好多人批評，點解唔畀人留言？玩fb玩到出神入化嘅自由黨榮譽主席田北俊（圖），都係咁話。
八方問田少，點睇CY都搞fb呢？佢話喎，開fb卻不設comment（留言），認真唔啱囉。而唔理CY嘅fb內容有啲乜啦，佢有一大「建議」畀CY，就係唔好畀「金毛毛」做fb管理員，否則肯定搞到一鑊粥。邊位係金毛毛？金鐘仁都姓金㗎喎！至於金鐘仁係邊個？上吓田少fb就一清二楚。
公民黨袋巾呼籲泛民齊齊add CY，睇吓CY係咪連搞fb都親疏有別。但八方相信唔使泛民出手，都知道CY壁壘分明，佢噚日朝早喺fb上載最近收成嘅小型水蜜桃盆栽，獲建制派讚好，並親自回覆藍絲網民話：「親手栽種，倍覺可口」。