雨傘運動過咗成年呢，保普選反暴力大聯盟竟然又有新搞作，準備本月31號開始，一連三個周末喺全港十八區搞名為「毋忘佔中禍害慎防動亂重來」圖片展，用意係提醒港人「保衞香港，人人有責」喎。
大聯盟發起人之一嘅王惠貞（圖中）話，揀呢個時候搞圖片展，正因去年11月，大聯盟發起反佔中還路於民簽名運動，有成183萬位市民簽咗名，所以𠵱家搞係合適時間。佢仲形容佔中係香港開埠以來，繼六七暴動之後一大動亂，所以有需要透過圖片展幫市民回顧，皆因和平「唔係屬於必然」。
既然主動提起六七暴動，八方當然問吓大聯盟會唔會同樣為六七暴動搞圖片展？點知王惠貞話無意搞喎，又指今次圖片展同「六四」無關。乜原來六七暴動同六四慘劇有關㗎咩？八方真係唔知喎！