百年老店先施（244）近年花咗唔少錢做推廣宣傳，都係希望一洗老餅形象，可惜消費者反應始終麻麻。公司下星期二又再出招，請嚟名模樂基兒（Gaile）做代言人，仲幫公司拍埋全新一季嘅歐洲時裝廣告。
先施到時除咗宣佈搵到「前天王嫂」樂基兒做代言人，順便宣傳先施新一季時裝之外；仲會公佈同Gaile舉辦慈善相片展覽與相集，又準備開設以歐洲時裝為主題嘅Pop-Up Store等。
近年積極求轉型嘅先施，先後喺銅鑼灣、旺角同埋中環開設三間新店，但消費者反應似乎好一般。公司兩年前請咗國內藝人劉馥怡做代言人，近排已經冇晒影，唔知樂基兒有乜法寶幫先施回春呢？