廣東俗語博大精深，等閒人物無法領悟；即使你是土生土長的香港土著，有時也會有「你講乜嘢」的感慨。
有一次我問朋友，「你隻錶幾靚，幾錢？」
他答：「三刀。」
沉默，空中飛過一隻烏鴉。
三刀？我甚至不知道是「刀」還是「都」，究竟「三刀」是幾錢？
我再問：「幾錢？」
「三刀！你係咪要，我幫你買一隻。」
誰知三刀是甚麼價錢單位？如果三刀是三百萬我賣身都唔掂。
我硬着頭皮問：其實三刀即係幾多錢？
他皺眉：有無搞錯，你係咪香港人？「刀」你都唔識？
沉默，空中飛過兩隻烏鴉。
慈母你拉我返差館，我身份證連埋報失在內，都換過四五次了，竟然還不是真．香港人。
我真的未聽過「刀」！
廣東俗語形容價錢，自成一格。
學校教的「十」、「百」、「千」、「萬」，在廣東俗語便變成「草」、「嚿」、「叉」、「皮」。兩草即係二十元，一嚿水即係一百元，一叉嘢即係一千元，一皮嘢即係一萬元。留意，不同的量詞會配搭不同的詞語作尾，例如「嚿」一定配「水」而不會配「嘢」，否則便變成「一嚿嘢」。
不同派系又有不同的度量衡單位稱呼，例如有人用「條」來代表「十」，2條即係20蚊；明明叫「一蚊雞」，但雞不只代表「元」，也代表「萬」，例如「輸咗幾雞嘢」。
「個」明明是勢孤力弱的單位，但如果香港人同你講「借廿個俾我」，其實即係問你借「二十萬」。
那「一刀」究竟是多少錢？
大陸也有「一刀」的講法，「刀」是dollar的音譯，即是一美元的意思。
香港的「一刀」呢？
朋友開估：「一刀即係一萬。」
估計原因：紙張計算單位，一刀即是一百張紙；一百張一百蚊紙，即是一萬元。