利世民兄前兩天的文章提到，香港有一難關叫公關，不稱職的公關太多，「操作的人太多，思考的人太少」，容我加多一句，具政治智慧的公關可能更少。
做廣告這一行，經常要和公關交手，有料之人當然大有人在，但也有公關做了很多年，連最基本的政治ABC也唔識，明知眼前就是個政治陷阱，還要一頭栽進去。
好多時候，公關會請廣告媒體公司幫手落報章廣告，為了客人最大福祉着想，廣告公司當然會爭取最佳版位。但如果出街的廣告喺左邊，客戶的負面新聞喺正右邊，那就弊家伙！ 有次真係因為咁，收到晨早凶鈴，被客戶死唔斷氣的痛罵。
對於這樣百年難得一見的巧合，廣告公司惟有say sorry。為了保住長遠合作關係，最多死死氣地賠錢，唔係可以點？眾所周知，新聞自主，報紙廣告部與編採部很多時候不會協調，廣告公司又怎能神通廣大，預視到邊一版會有客戶的負面新聞而要避之則吉？
有次，有公關為求補鑊，竟然要求廣告公司白紙黑字，請報章的廣告部不要再發生這麼愚蠢的事，大意係如有負面新聞，唔該早響，當日唔落廣告！
那一刻，腦海即時閃過一單幾年前的新聞，一間廣告媒體公司代表港鐵去信各大報章，警告日後若有港鐵負面新聞，不排除抽起廣告，結果演變成一件公關大災難。如此低級錯誤，人家已經犯過一次，這些公關還可以視而不見，準備再次犯險。明知你拿着火水，潑向火坑，我無理由坐視不理。惟有由一個廣告人，反教一個公關人，咩係政治危機。
年資不代表一切，有些地位超然的公關，遇上政治事件，也會騰騰震，最鍾意call齊一眾人等開個大會，以為幾個臭皮匠，勝過一個諸葛亮，結果人多意見亂，搞到佢個心仲亂，立場自然搖擺不定，遲而不決，結果都係拋返個波比大大大老闆拍板。旁人看在眼裏，就叫無智慧兼無膽識。Again，好的公關是有的，只是唔夠fit嘅也大有人在，而可能仲坐在高位㖭。
文廸晞
mailto:[email protected]