見到「我訂花」呢三個字，有冇人會估到佢係公司名！唔係講笑，有間「我訂花控股」最近向聯交所遞交上市申請，佢做乜生意？咪就係訂花囉。
呢間內地公司，2010年開始搞網上訂花業務，網站聲稱，配送範圍遍及中港台。客戶喺佢哋網站訂花之後，佢哋會向合作花店落單，再送花畀人。
呢盤生意嘅重點，應該係公司可唔可以準時送到靚花畀人。公司初步招股文件嘅風險因素都有寫明，如果送唔切、包裝爛等等，都會好影響集團聲譽，不過佢哋聲稱，由有記錄開始，都未收過重大投訴，而產生重大財務損失喎。
話時話，呢隻股將來如果成功上市，散戶想打電話畀經紀落盤，最好都係講冧巴，否則係咁話「幫我買我訂花」又買又訂花，都幾亂！