中環在線:傳張松橋放售淺水灣大屋 - 李華華

中環在線:傳張松橋放售淺水灣大屋 - 李華華

樓市係咪進入熊市,大家仲係估估吓,但市場上就有好多業主,想把握機會,𠵱家喺高位放售貴重物業。人稱「重慶李嘉誠」嘅渝港國際(613)主席張松橋,就係其中之一。
張松橋十幾年前持有淺水灣寶晶苑14幢洋房,初初用作收租,之後陸續喺市場拆售,賣吓賣吓,家陣只剩間相連大屋。
聽聞呢間相連大屋,正低調放售,叫價5.5億元。大屋合併咗,實用面積有成5,041方呎,認真有大宅氣派,內有私人電梯,加上望到淺水灣泳灘海景,係淺水灣罕有放賣嘅大屋。如果真係有人願意畀5.5億元,實用呎價要10萬元一呎,可以挑戰山頂大屋價。
寶晶苑1988年已經落成,有27年樓齡,據聞藝人謝霆鋒都曾經係寶晶苑業主。