19歲少女勞美蘭因患上肺血壓高，最終等唔到合適雙肺移植病逝，令社會關注器官捐贈問題。立法會大會噚日討論本港器官捐贈計劃，人力慢必陳志全話非常支持，仲話讀書時已簽咗器官捐贈卡。
早已公開「出櫃」嘅慢必好關心同性戀者器官捐贈問題，佢話男同性戀者，即曾經同過男性發生性行為嘅男性，喺香港捐血有限制，被定義為永久不宜捐血，佢即席問高永文局長，到底自己合唔合資格捐贈器官？仲話如果有限制，佢就要去取消器官捐贈登記。
慢必呢個問題明顯考起民望高：「呢一刻我掌握唔到，只知道器官捐贈會因應唔同器官，有唔同條件」，民望高話要返去睇睇有冇相關資料先答到。