蔡卓妍（阿Sa）同陳偉霆5年情玩完後，專心投入工作，日前有報道話阿Sa為咗避開舊愛，身家過億嘅佢實行搬去買咗幾個月嘅紅山半島豪宅。前晚阿Sa喺金鐘出席一雜誌頒獎禮時話：「我唔打算公開住址，住邊同感情冇關係，間屋企係我阿媽搞，我未知係咪自住，你問我阿媽喇。」下個月分別係佢同陳偉霆嘅生日，問阿Sa會唔會交換禮物，佢𤷪𤷪地咁話：「唔好問呢啲喇，激氣呀！」
Chilam爆城城想結婚
同場嘅張智霖（Chilam）講到喺郭富城50歲生日會送畀老友嘅書法大字，佢話：「我月初去咗普陀山參見一個94歲嘅和尚，專幫人寫啲字，知道老友10月26號生日，所以就準備咗吉星高照送畀老友。」問佢點解唔係送「成家立室」？Chilam就爆城城一早有成家立室呢個想法，而吉星高照已經包羅萬有。周秀娜就自爆周媽媽喺佢25歲嘅時候搵相士問前程，佢話：「嗰時話我31歲會結婚，仲有一年時間，但係只要遇到啱嘅，幾日都可以結婚。」
撰文：馮仁昭