喺新加坡舉行嘅WTA年終賽周三繼續有分組賽，姬維杜娃喺白組同莎芬露娃合演捷克打吡，結果直落兩盤贏7:5、7:5，保持出線希望。
細威轟網壇種族歧視
同樣左手握拍嘅姬維杜娃同埋莎芬露娃，都喺首場分組賽輸波，周三碰頭合演第二輪，輸波一方好大機會出局。成場波由贏過兩次溫網女單冠軍嘅姬維杜娃控制戰局，最後贏7:5、7:5。賽後佢話：「我好開心可以喺輸波之後反彈。同時，我亦好高興見到有兩個捷克球手入到WTA年終賽。」至於另一場比賽，西班牙嘅梅古露莎以6:4、6:4擊敗德國嘅姬芭，兩戰全勝。
另外，美國女球手莎蓮娜喺綜合雜誌《WIRED》度話，就算佢喺網壇攞到好高嘅成就，但仍然受到種族歧視。冇玩今屆WTA年終賽嘅細威話：「我係個黑人女人，但我身處嘅體育項目，似乎唔係畀黑人玩囉。」
與此同時，周三原來係細威出道20周年紀念，喺1995年10月28日，佢以14歲之齡喺職業賽初登場，但就以1:6、1:6輸咗畀當時18歲嘅同鄉安妮米娜。細威話：「我輸咗，所以覺得好唔開心。我冇打出應有水準，表現同一個業餘球手根本冇分別。」