《嚦咕嚦咕新年財》是小弟「人生十大電影」之一。除了好笑，最重要是戲中信息有意義：連麻雀大俠都一樣有運滯時。順境波人人識踢；但遇着劉華於戲中「鋪鋪揸爛牌」的低潮，誰又可像他一樣「越爛嘅牌，越畀心機去打」？現在於摩佬（圖）面前，正是其職業生涯前所未有的一副爛牌。
誰也估不到，上季的冠軍防線，泰利、伊雲洛域今季瘋狂跌watt、泰拔高圖爾斯長唞；前線迪亞高哥斯達、法比加斯、夏薩特又齊齊狀態下跌；同時，紅牌、12碼冇判等不斷出現；上場甚至明明個波睇見入咗，鷹眼都話未入……確係黑得勻循。人黑，係控制唔到；但點應對就絕對可以控制。呢期鋪鋪揸爛牌的摩佬呢？先怪罪軍醫，再鬧鬼球證，上仗輸波後就封殺傳媒。其實揸爛牌，最忌發爛渣，反而要保持冷靜；現在摩佬正是「牌越爛，心情越爛」，咁又點反底？
摩佬從未試過於一間球會完整教畢四季，今季似乎又在走上舊路。其實低潮誰未遇過，如費Sir教曼聯頭幾年、雲格的九年無冠……能夠打好「逆境牌」，先有能力打足16圈。現在我最期待的，不是落井下石，反而是看摩佬是否具備真正大師的打「逆境牌」能力；如他又是「打三圈走人」，我會好失望。
方栢翹
now足球評述員