潮流興拍片，就連「籃球之神」米高佐敦都跟風，為放售位於美國芝加哥市郊嘅豪宅拍咗條55秒嘅短片，但條片主要介紹佢間屋，佢冇出場。
米高佐敦都幾陰功豬，呢個市郊豪宅放售3年，原先叫價2.2億元，兩次拍賣都食白果，流標收場，到今年5月，佢將叫價勁減一半，至1.16億元，都係無人吼。
新近佢再出招，搵來有10年買賣豪宅經驗嘅星級經紀Kofi Nartey，希望利用名人效應增加號召力。
米高佐敦呢個豪宅真係豪，有5.6萬平方呎，附設世界級運動設施，包括標準籃球場、網球場、高爾夫球場、Gym房，仲有9間房、17個廁所同埋15個車位。
可惜夠豪唔等於有人鍾意，加上環球經濟唔穩定，美國又醞釀加息，所以條片出街後，市場反應好冷靜，有人話如果真係要買，不如好似打波咁組隊一齊買喎。