「Son姐我好嬲！我真係好想知我應該點做，我被老闆出賣！早幾個月前我跟老闆一齊跳槽，其實做多幾個月我就有花紅出，佢叫我唔使擔心，過到嚟新公司會賠返畀我有多無少咁話。跟咗佢幾年，佢好信任亦重用我，所有事都放手畀我做，所以我進步好多亦好有滿足感，所以我先至會信佢肯放棄差不多到手嘅花紅同佢一齊走。啱啱過試用期，加咗幾百蚊人工，但係佢突然同我講因為公司業績唔好所以全面取消花紅派發，我都當然一樣冇。佢做唔到當初點解要應承我？嗰度講緊十幾萬，一句話冇就冇，我真係想即刻拍枱唔做，一鑊蹺起佢，咁樣做會唔會好過份，會唔會影響我日後搵工？我可唔可以告佢要佢賠返畀我？」
記住所有喺盛怒之下做嘅決定，都一定錯漏百出，被憤怒掩蓋了理智，只會做令自己傷上加傷的愚蠢事。你老闆所講的，未必全部係大話，今年很多公司的業績都比預期中遜色甚至有大倒退，公司一刀切不發花紅，絕對有可能。因為出不出花紅，公司有絕對最終的話事權，生意好就有生意唔好就冇，員工們確實沒有討價還價的餘地。
我知你好嬲，但交了學費得不到教訓你就名副其實total loss！事實你自己都要負一部份責任，你老闆講你就信。沒有在合約上寫清楚，對你自己根本一點保障都沒有。
向好的一方面想，他自己亦可能是受害人，事情不在他控制的範圍內。向壞的一方面想，他一開始信口開河，但求你肯跟他一起走，甚麼都應承。你的現任僱主根本不知道你們之間存在有花紅承諾這回事。
你要告老闆，民事訴訟你有權，但結局只能是通輸。稍安毋躁，下一篇再為你拆解。
張慧敏
http://www.facebook.com/HKcareerdoctor