估唔到一段新聞，會引起兩大黨圍攻。無綫新聞部喺24日、即係青嶼幹線因撞橋事故封閉後一日，報道指10幾年前政府已構思多建一條通往赤鱲角嘅道路，但2002年3月提交立法會時喺建制派、民主黨等反對下被否決。
民主黨日前去信無綫新聞部，要求澄清佢哋當年投票支持而非反對；噚日輪到民建聯去信話報道與事實不符，指當時提交立法會嘅撥款申請只關乎十號幹線嘅北段（即掃管笏至元朗公路路段），唔涉及連接大嶼山部份，指報道話佢哋反對當局構思通往赤鱲角道路係「錯誤陳述」。區選前夕，難怪咁緊張；八方搵過無綫外事部，截稿前冇回覆。