有「洋參大王」之稱嘅恒發洋參（911）主席楊永仁，終於做埋證券行老闆，佢私人持有嘅恒發金融噚日正式開張。
楊永仁話，自己做洋參生意，識落唔少做投資嘅朋友，自己又鍾意投資，所以咪開番間證券行囉，佢打算稍後向證監會申請九號牌，做埋資產管理生意，未來亦有打入內地市場，不過就未有時間表。
陳永陸、沈振盈等股評人噚日亦有到賀，除賀恒發開張，亦恭喜股評人林家亨轉工。林家亨由立法會議員張華峰間恒豐證券，跳槽到恒發做董事總經理，張華峰都有到，跟楊永仁握晒手講笑，心胸跟個肚腩一樣咁廣闊喎。
楊永仁澄清話，佢冇撬走林家亨，只係兩人有緣，一拍即合，林家亨過到去恒發，除咗要幫客仔做投資分析之外，仲要計劃公司業務發展。