象徵西方憲政民主基石嘅英國《大憲章》，11月11日至14日將會喺金鐘太古廣場嘅蘇富比藝術空間展出。今次展出嘅《大憲章》屬1217年版，係首次確立任何人、包括君主都要遵守法律原則，最著名嘅條款係任何自由人不得未經合法審訊或未經當地法律嘅審訊而被監禁，以及不能剝奪任何人伸張正義嘅權利。
英國總領事吳若蘭話《大憲章》係英國同香港法律制度嘅基石，原則受得起時間考驗，指展覽係一個好機會去頌讚英、港兩地共同擁有嘅普通法傳統，希望市民都去觀賞吓呢份歷史性文獻。
《大憲章》會喺全球巡迴展出慶祝800周年，但喺北京一度被河蟹，展出地點由中國人民大學突改至英國大使官邸；結束香港展覽後，會喺新加坡、馬耳他同葡萄牙展出。