國泰噚日搞咗場品酒會，介紹9款最新入選航班嘅餐酒，包括來自法國波爾多地區嘅2款白酒及3款紅酒，包括Château Smith Haut Lafitte Blanc 2011、Château Haut-Bergey 2005，以及4款阿根廷紅酒，下月起喺頭等及商務艙有得飲。
國泰飲品及餐膳供應經理葉嘉華話，人喺搭飛機時味覺會比較遲鈍，加上機艙較乾燥，所以佢哋挑選果味豐富、單寧柔和而酸度適中嘅佳釀。佢話紅白酒都會暈機浪，當中部份果味可能被「搖散」，國泰揀酒時指定由產地直送，順便做埋飛行測試。資深傳媒人劉致新係國泰嘅品酒顧問，話國泰揀酒非常嚴格，約200至400款先揀到一款，全部係blind tasting，仲話好多酒商渴望被國泰選中。