前晚大台台慶劇《梟雄》首播，陣容強勁，有黃秋生、湯鎮業、黎耀祥、馬國明等等，仲有海報上被「移後」的胡杏兒同吳卓羲。講到卡士咁勁，網民自是翹首以待。
故事講三十年代上海新政府成立，城區被劃分為華界、公共租界及法租界，其中法租界由上海三大亨「翟金棠」(湯鎮業)、「龔嘯山」(黎耀祥)及「喬傲天」(黃秋生)創立嘅三鏗公司壟斷大部份鴉片生意。向TVB說不嘅網民，口裡說不，但為咗秋生同湯鎮業，都忍唔住開番部電視睇下，點知……睇咗陣，已經有人強帖留名「推到完場」——唔係正評，而係負評。以下呢幾個穿崩位，真係幾令人O嘴。
1.同一角色，後生嗰陣講粵語，老咗講上海話？
秋生喺《梟雄》裡面飾演喬傲天，用鄉音(其實係上海話)演出，仲係有人話秋生根本就係用番佢喺電影《葉問：終極一戰》嘅鄉音講對白。不過口音嘅嘢，聽唔聽得明，真係好講慧根。離奇嘅係，喬傲天後生版，係馬國明飾演，但馬明喺劇中，係講廣東話。咁點解同一個角色，語言有咁翻天覆地變化？唔通人老咗，就思鄉尋根改口音？也有網民留言：「我覺得黃秋生啲口音會破壞晒成套劇。」
2.火燒鴉片？嫌唔夠High？
套劇一開始就講劉江去救佢嗰個食霸王煙(即抽鴉片煙)嘅仔俊傑，如此好戲之人出場唔夠10分鐘就被人斬死咗。劇情講有班建國大學嘅學生火燒「燕子窩」——鴉片竇，藏貨一定唔少，用火燒？編劇有冇常識？今年6月，吉林舉行一個禁毒大會，將由公安檢獲嘅毒品，以火燒銷毀，在場煙霧瀰漫，想唔high都幾難。林則徐當年虎門銷煙，係「銷」煙唔係「燒」煙，係用石灰0架！
3.「內街」被毆似曾相識？
飾演龔嘯山嘅黎耀祥，捉咗劉江個仔俊傑去內街，下令手下將之打至頭破血流，此時秋生即往營救——「內街」是否似曾相識？