呢排大台興翻播神劇，好多人睇完晚間新聞就坐定定睇《男親女愛》，不過我求大俠就鍾意歷史劇多啲，同時段就睇緊《楚漢》，話咁快套劇就做到尾聲，好快就做到垓下之戰，項羽四面楚歌㖭；講起困境，車路士領隊摩連奴何嘗唔係四面楚歌，料面對英足總多達五場停賽令，周六車利大戰，仲搵埋死對頭卡頓保執法㖭，甚至傳到拜仁慕尼黑教練哥迪奧拿已經準備好接手。
鬥紅軍由「仇家」執法
車路士上周六作客不敵韋斯咸，摩連奴半場休息期間就尼曼查馬迪紅牌被逐同球證理論，結果被罰上看台，英足總已經宣佈對佢嘅不當行為進行起訴，英國《鏡報》就話因為案情嚴重，加上寸王之前案底多多，五場停賽走唔甩，周六主場對利物浦呢場聯賽，摩連奴好大機會都唔可以臨場督師嘞。
英足總唔知係唔係有心想整走佢，呢場大戰就安排卡頓保執法，卡頓保之前就俾車仔中場約翰米基爾投訴過種族歧視，今季主吹過車仔作客3:2險勝西布朗場比賽，就趕咗隊長泰利出場，唔知今仗又會點對待藍戰士呢？
傳哥迪奧拿季尾接手
雖然據報炒摩連奴要賠3,000萬英鎊（約3.6億港元），不過對車路士班主阿巴莫域治嚟講，錢唔係問題。如果真係炒摩連奴，都要搵到有番咁上下級數教頭接手，英國博彩公司威廉希爾開出嘅車仔下任領隊賠率，拜仁教練哥迪奧拿竟然一躍成為大熱，只得3.25倍，次熱係馬體會教練施蒙尼，都有7倍，反而接慣爛攤子嘅安察洛堤有11倍。哥迪奧拿帶巴塞同拜仁都拎到好多冠軍，份量就一定夠，不過最大問題係今季尾先同拜仁約滿，拜仁唔會季中放佢走，車仔唔通等到季尾先炒摩連奴？不過到時可能降埋班都唔定。
車路士上周六輸畀韋斯咸，槌仔幫中鋒安祖卡路爾頂入奠勝入球做英雄；周日佢去到倫敦一間日本餐廳食飯時，竟然遇上個醉酒車仔球迷，雙方先口角，然後鬥潑紅酒，好彩有保安勸開先冇開拖咋，不過車仔球迷如果理性啲，都知道愛隊戰績低迷唔關對手事啦。