曾經被囡囡齊昕踢爆，唔知乜嘢係facebook嘅特首梁振英，日前終於唔介意開設個人fb賬戶，仲喺14個鐘內連發4帖，除咗有大家好關心嘅調理農務系列，包括介紹自己種嘅火龍果同葡萄外，同公開旅行「艷照」，po咗好多沙灘上嘅美女「走光」相嚟呃like。
仲話介紹畀鈺成主席
CY開fb已經變成全城熱話，噚日朝早佢出席行會前話呀，自己「仲學緊」用fb，「我呢個年紀嘅人做fb點都冇你（記者）呢個年紀咁容易，一步步做啦」。而佢亦喺fb新增財爺曾俊華做friend。
其實呢個fb都惠及唔少人，例如新聞統籌專員馮煒光可以名正言順攞高薪玩fb。八方發現CY噚日就po咗自己大半年前去馬爾代夫度假時影嘅風景相，當中最惹人注目嘅，當然唔係佢嗰個背景，而係人都無幾個，全部美女都「走光」， 一個都見唔到囉！佢仲留言：「去過馬代，不想去其他地方玩水。」不過CY偏偏要將外遊問題扯到去立法會主席曾鈺成身上。查實曾鈺成早前都講過，話同CY有偈傾，證據就係CY介紹佢去馬爾代夫玩嘞。CY特別喺fb引證此事，話提議曾鈺成到馬爾代夫：「剛過去的暑假，他（曾鈺成）去了，還住了我住過，向他推薦的酒店。鈺成主席回來說，相當滿意。」咦，前日曾鈺成先寫咗題為〈不准連任〉嘅文章，好似針對CY咁；莫非CY想用呢件事，引證曾鈺成唔係針對自己？
李八方
mailto:[email protected]
