特首梁振英不嬲都係「神級邏輯王」，講咗等於做咗呢家嘢就令人好欽敬。佢噚日朝早回應機場興建第3條跑道爭議時又施展神級邏輯理論，令網民嘆為觀止。佢講咗啲乜呢？原來係：「大家知道，三條跑道點都好過兩條跑道，兩條跑道有問題的話，我哋都仲有第三條跑道。」
網上關注三跑嘅組織「反對興建機場第三條跑道 No 3rd Runway」，如獲至寶，隨即編寫Generator（生成器）——「N+1樣嘜嘜點都好過N樣乜乜」，玩法好似老虎機咁，只要拉吓手掣，就會隨機幫網民造句，回應特首。八方試玩嘅結果點呢？「三個夏蕙BB點都爽過兩條跑道」、「一個689點都好過起唔到機」。如果唔啱大家心水，不妨自己去 http://bit.ly/1RyMiwU 試吓。