中學同學S上網甚勤，不時傳來內地網上新聞及趣聞，這日又傳來近日內地網流傳嘅「順口溜」，香港人睇到，一定唔舒服，但又無可奈何。
「珍惜生命，遠離香港」
「香港，買，挨宰；不買，挨揍。」
「香港，購物者天堂，但不購物者，送你上天堂。」
「香港購物講粵語，打八折，講英語，打六折，講普通話，打到骨折。」
旅發局不斷在外地賣廣告，宣傳香港，特區政府又花費千萬元推廣購物優惠，點知運滯碰上一單購物團團員懷疑被打死案件，乜嘢宣傳都變成白費，上面講嘅香港旅行順口溜在內地傳開晒，傷害香港形象甚大。
以前問過旅遊界人士不知幾多次，個個嗌冤枉，話啲打人呀，傷人呀，鬧交呀等內地旅行團爭執事件，幾乎百分之一百係內地人一條龍旅行生意嘅後果。乜嘢一條龍？就係已有本港身份證之內地人在港開設所謂旅行社，接待內地零團費旅行團，背後在紅磡尖沙嘴開埋「旅行團零售專門店」，同時與內地深圳之旅行社合作，在深圳招攬零團費客戶，聚集成團，送來香港，跟住就由本地註冊嘅旅行社接待，送團友入「專賣店」劏羊，香港人頂多係在下游開「專賣店」，派回佣啫，多係唔敢做埋刀手嘅。
內地人來港開公司，與內地人勾結去劏內地遊客，因香港一切按法律辦事，好難干預，到發生事故嘞，內地傳媒就歸晒香港數，大力唱衰香港，香港似乎只有挨打份兒。有人猛話政府監管不足，要成立一個旅遊業監管局（旅監局），係唔係可以解決上述問題呢？睇怕唔得噃，只要內地人一條龍按足法律程序辦事，向內地矇查客開刀，甚麼旅監局都管唔到。
高檔內地遊客早已不跟旅行團，鍾意香港嘅就自己嚟，唔跟旅行社，情況同我地去曼谷或東京相同。在深圳入團來港嘅，怕係平民中嘅平民，英文所謂marginal（邊緣）旅客，唔多見過世面，所以容易俾旅行社恰，香港旅遊業做死都係鞭長莫及，管唔到。有人講到話立法禁止旅行團購物，點禁呀？唔准旅行團集體進入零售店？人地化整為零又如何？香港唔應該為了內地旅行團而訂立惡法去限制任何人士的行動自由嘅。