思捷環球（330）主席柯清輝應該很高興喇，事關公司前日宣佈新一個財政年度，首季（即7至9月）同店銷售增長一成，屬2013年以來首次回升，刺激思捷股價噚日好似坐上火箭一樣，收市升近23%，收報8.24元。
重點係，柯清輝由本月14日開始，連續4個交易日增持思捷，共買入100萬股，平均價約6.55元，呢批貨已升值26%。行政總裁馬浩思亦跟柯清輝入市，本月16與19號兩日，買入50萬股，平均價約6.54元，即獲賬面利潤。
難怪投資老手成日教散戶買賣股份，要睇住公司管理層或大股東嘅行動，如果跟柯清輝買思捷，今次就有斬獲嘞。
不過又咁講，柯清輝另外都有一批成本較高嘅思捷，按聯交所資料，佢前年與舊年買入嘅200萬股思捷，成本價約11.8元，換言之，佢要繼續努力做出業績，先有收成。