鍾意睇入波嘅球迷，周日都應該收貨，雖然英超雙曼大戰悶和0:0，不過英、西、德、荷四個聯賽，都有大比數嘅比賽，咁啱有四位球員上演帽子戲法，包括幫巴塞隆拿上陣一周年紀念嘅蘇亞雷斯，連中三元幫球隊3:1反勝伊巴。
巴塞與皇馬並列榜首
巴塞隆拿呢排興輪流威，之前個場5:2炒華歷簡奴，尼馬就入四粒，上周中歐聯對巴迪，就由拿傑迪錫包辦兩個入球，今次就到阿蘇發威，不過巴塞呢場波都叫有驚無險㗎，因為伊巴喺開波10分鐘已經由保查干沙利斯先開紀錄，巴塞今季15場比賽竟然有八場先失波，好彩阿蘇11分鐘後就追平；換邊後，佢再接應尼馬傳送反超前2:1。而馬斯真蘭奴就喺83分鐘直紅，巴塞喺少踢一人情況下，仍然靠一次反擊，由阿蘇喺85分鐘完成帽子戲法，以3:1擊退伊巴，追至同皇馬同得21分並列榜首，不過呢場巴塞「讓球主客和」[-2]，結果開咗「和局」。
其實阿蘇今場發威都有迹可尋，事關周日係佢首次幫巴塞上陣嘅一周年，呢位烏拉圭前鋒賽後就講：「今日對我嚟講係特別有意義，雖然上半場錯失唔少機會，幸好下半場都入到兩球。」阿蘇𠵱家累積七個入球，升上西甲神射手次席，落後隊友尼馬一球。
35歲古積特又中三元
講開阿蘇，另一位前利物浦前鋒都好威，佢就係荷蘭前鋒古積特。35歲嘅古積特周日領飛燕諾3:1大勝阿爾克馬爾，連續兩場戴帽，累積入球增至10個。紅軍剛剛又失分，好多利物浦球迷都希望高路普可以帶奧巴美揚到晏菲路，呢位多蒙特前鋒同日對奧格斯堡又連中三元，幫球隊大勝5:1，連同歐霸盃連續兩場戴帽，奧巴美揚咁醒神，紅軍要買佢就更加難。至於季初喺英超沉寂咗一輪嘅熱刺射手哈利卡尼，亦喺周日作客般尼茅夫發威，𡁻入三粒，一吐烏氣。
