在行家心目中，渣馬是經典，但也累人不淺。
不是嗎，自從這活動影響力正式確立之後，惹來各大企業覬覦，人人都想在大型體育活動上分一杯羹，挖盡心思想成就一個有相若影響力的活動，咁多代人計計埋埋，又brainstorm又做proposal，一干企業不知花了幾許executive hours。
跑樓梯、單車百萬行，以至五花八門的馬拉松都是類似產品。近年的維港泳算是頗成功例子了。它的好處是參與門檻低，有件泳衣便可以，不需太多昂貴配備，數年下來，已漸漸入屋。
但搞這類型活動就一定要準備充足，作好隨時遇上危機的部署。去年無事，係你好彩，不等如今年你可以腳印印等慶功。即使渣馬，自97年至今亦經歷唔少風浪，冇嘢可以一帆風順，必須堅持和不停改善才可以真正成為signature event。
今年的維港泳及新搞作單車節剛舉行了，兩個活動都各出現了參賽者投訴的風波，兩種處理手法，不無參考價值。
單車節第一年搞，經驗不足，兼遇上不理想天氣，雖有不少手忙腳亂、安排不周之處，但勝在認錯夠快，又承諾檢討安排，即使依然有個別媒體大罵甚麼盛事變醜事，但始終冇乜炒作的剩餘價值，而且大會孭晒，贊助商總算有驚無險。
反而維港泳那場自製公關災難，就真的有點無謂。話說當日又係安排欠佳，有多名參賽者包括去屆冠軍人馬被取消資格，正向在場記者申訴做訪問之際，竟遭公關企圖強行拉走……
嗱嗱嗱，首先我唔認為大家應該再畀壓力出手那位行家，因為做得stupid決定嗰位通常都唔夠膽自己動手，一定會叫下線execute，所以出手那位可能係代罪羔羊。但係眾目睽睽下要公關做公安，與記者為敵，請問是那位公關高手的獻計？安排不周事小，妨礙新聞自由事大呀老友！
彭瑪莉
mailto:[email protected]