以心靈導師自居嘅塔羅牌占卜師姚安娜（Lilith）最近以「心靈女王」稱號重出江湖，殺入樂壇，前晚佢喺九展舉行搞咗個「一千零一夜故事演唱會」，有唔少藝人捧場，仲見到江希文帶埋疑似係兩歲幾囡囡Natalie同江欣燕去睇。姚安娜仲同老公喺台上合唱《無間道》，又讚老公有情有義，而佢16歲嘅囡囡都有嚟到現場支持，5歲囝囝就冇現身。
Lilith話有一連串復出計劃，仲會出碟：「到機會啱就會出，都有幾首歌喺手，可能因為我做心靈工作，所以都有好多唔同嘅單位想同我合作。」講到5歲仔，佢話之前囝囝拍咗個太陽眼鏡廣告：「囝囝有語言障礙，所以要靠身體語言表達，所以佢啲動作都會成熟啲。」
雨僑諗結婚
之前同姚安娜合作過節目嘅雨僑擔任嘉賓，唔知雨僑有冇向姚安娜打聽過男友羅力威係咪真命天子？雨僑話：「佢又冇直接講，淨係教我最緊要係珍惜，要用生活感受對方。」但講到結婚佢就迴避話：「好多年前姚安娜有講過16、17年會係事業高峯。」咁係咪過咗高峯就可以結婚，雨僑即刻話：「承你貴言。」
撰文：馮仁昭