區選殺到埋身，有啲政界中人話呀，今屆氣氛好似好靜局喎，又話有傘兵落區會有焦點、又話傘後嘅首場選舉應該好熱鬧，但係唔知因為時機未到定乜解究，至今坊間對區選反應都算冷淡，有建制派中人反而話覺得氣氛不尋常，質疑係咪有啲大鑊嘢喺選舉前爆。
激進溫和越走越遠
查實花生友都好理解，選民點解唔太關心區選，始終都係一個細區嘅問題，唔似得立法會咁係一場意識形態大戰，好多市民難免會掉以輕心。有人或者會話，2003年50萬人上街後，同年區選反應都好熱烈喎，今次同樣有佔領運動帶動，理應都會推動大家更關心至係㗎，但有政界同花生友講，唔好咁簡單分析。
佢話今次同2003年最大分別，係當年遊行後不足半年就到區選，泛民支持者熱度未退，但今次區選其實都同佔領運動相距近一年，政治一日都嫌長、何況一年？再者呢個佔領運動唔似得2003年咁，泛民支持者有一致目標，反而連內部都有分裂，激進同溫和路線越走越遠，成個泛民陣營都散散哋，又點可以大力推動區選創2003年奇蹟？
花生友
周二、四刊出