身兼青年事務委員會主席嘅華置（127）主席劉鳴煒似乎正努力洗脫離地嘅富二代形象，最近不停參加大型體育活動，跑步、踩單車、游水乜都玩，趁萬聖節又化個恐怖妝喺海洋公園嚇人，佢仲喺自己facebook（fb）上載一張麥記食物相，應該想話畀大家知佢唔係一定食貴嘢，幾十蚊一餐嘅麥記都ok！
劉鳴煒前晚好夜上載呢張麥記食物相，見杯凍飲有膠袋袋住，應該係外賣，原來佢鍾意魚柳包同脆辣雞腿包。周日佢晨早去咗淺水灣參加百萬泳，佢話嗰日下晝1點過後就冇食過嘢，之後又去咗海洋公園（應該又係扮鬼嚇人啩），身心俱疲咁話。
劉鳴煒自從建議年輕人去少啲日本之後，離地形象深入民心，最近佢積極利用fb改善形象，想拉近同普羅市民嘅距離，係咪得到高人指點呢？