聽立法會主席曾鈺成一席話，真係勝過讀萬年政治書！曾鈺成噚日喺免費報章《Am730》專欄撰文，名為〈不准連任〉嘅題目真係嚇親人，唔通佢收到來自天朝嘅消息，決定唔畀特首梁振英連任？政界花生友睇完，雖然發現冇乜朝廷獨家猛料好爆，卻個個發出會心微笑，大讚曾鈺成認真厲害。
話只任一屆「膽自大」
點解？皆因曾鈺成提到，好多國家都規定首長唔准連任，佢以日前同訪港墨西哥外交大使會面時，講起任期問題為引子，強調墨西哥憲法規定，總統只可出任一屆、即6年咋，因為要防止好似迪亞斯（Porfirio Diaz）嘅獨裁者出現喎。
如果得6年，唔會令施政流於短視冇願景咩？曾鈺成點會估你唔到，佢解答埋話美國總統只可連任一次，即任期最長8年，但實際可以履行職務時間都係有6年多啲，皆因第4年會掛住爭連任；第二屆最後一年，下任總統當選後，在任嘅又成為跛腳鴨，相比之下，墨西哥總統就唔使花時間做競選連任工作，6年任期大部份時間都可以正常履行職務，佢仲引述大使話呀，總統若只任一屆，可以較少受民粹主義影響，由於唔爭取連任，總統亦唔會擔心失票而唔敢推出有爭議的政策，咁樣先至「官到無求膽自大」。
不過，曾鈺成噚日出席活動就否認話CY唔應該連任。唔知CY聽到會點諗呢？
李八方
mailto:[email protected]