海洋公園哈囉喂全日祭踏入15周年，一班動物大使包括兩位今年出生嘅動物寶寶，首隻在港出生嘅紅頸袋鼠同二趾樹懶寶寶，都玩南瓜過節。
好似平日扎扎跳嘅紅頸袋鼠，一見到個南瓜就跳去旁邊，八卦一番之後就輕舔吓，小袋鼠寶寶見狀都跟住上前聞一聞；由於小袋鼠寶寶有基因白化症，毛髮白雪雪喺鮮橙色嘅南瓜旁邊好突出。二趾樹懶寶寶雖然成日匿喺媽媽懷中撒嬌，亦不忘探索吓呢個小南瓜。全球最大嘅齧齒動物水豚以及雪白北極狐，各自圍住南瓜歡度哈囉喂。今年海洋公園哈囉喂全日祭開放到11月1日，仲餘下4個特選日子，想同動物大使一齊慶祝哈囉喂就要快啲嘞喂。
