汲水門橋上周五被躉船吊臂撞到橋底，令唯一通往機場嘅交通癱瘓兩粒鐘。查實政府2002年曾建議興建青龍大橋，連接元朗公路同大嶼山，分流機場交通，但被立法會財委會否決，當年好多建制派反對，民主黨就贊成，點知無綫翡翠台翌日新聞報道卻話當年「公民黨及民主黨亦反對」，而公民黨當年仲未成立囉。區選前夕搞埋啲咁嘅嘢，對政黨嚟講好濕滯，民主黨單仲偕噚日去信無綫新聞及資訊部總監袁志偉，要求新聞部公開澄清錯誤報道。
單仲偕話呀，無綫嘅錯報可能違反《電視通用業務守則》，指無綫喺報道出錯後，理應即刻根據守則作更正聲明及澄清，但至今都冇，所以去信要求公開澄清，還原真相。八方噚晚8點零鐘打過畀袁志偉，佢話揸緊車唔方便傾電話，之後cut咗線。