利物浦繼續贏唔到，周日英超主場迎戰修咸頓臨完場失波，被對手以1:1逼和，由高路普領軍下三場波全部都和局收場，不過高帥賽後都仲話冇壓力，唔使驚。
紅軍喺周日場英超，踢到77分鐘由前鋒賓迪基先開紀錄，高路普開心到彈起，諗住仲唔開齋？點知踢到86分鐘被對手前鋒沙迪奧文尼扳平。上任後三連和，高路普賽後話：「班球員踢得好努力，但臨完場失波，一下子變到好似世界末日咁，事實絕對唔係咁，我哋仲可以捲土重來。現階段我唔明白壓力何在，但班球員確實感覺到。」
唔少利迷都視守將洛夫雲為紅軍「毒瘤」，估唔到球會嫌一個洛夫雲驚嚇唔夠，實行打孖上，傳佢哋有意斟介洛夫雲嘅17歲細佬迪華洛夫雲（Davor Lovren），可以踢右翼同前鋒嘅迪華，雖然擺烏龍嘅機會比較低，但嚟到會唔會變咗專幫對手解圍嘅前鋒呢？