金管局舊年10月正式推出「硬幣收集計劃」，兩部由貨車改裝而成嘅收銀車（俗稱神沙車），不停在港18區行走，對於儲落好多神沙而唔知點用嘅市民，真係好幫到手。新近呢部神沙車仲攞到國際貨幣事務協會嘅「最佳貨幣創意」大獎㖭喎。
呢個協會由各國央行與貨幣印製同業代表組成，代表喺27項提名、12個入圍名單中，投票選出4個大獎，其中之一，就係金管局奪得嘅最佳貨幣創意大獎嘞。金管局貨幣主管陳葉小明，早前已飛去西班牙，代表領獎。
神沙車喺過去一年已經完成5次巡迴全港18區。截至今年9月底，逾13萬名市民使用神沙車服務，收集到嘅硬幣有1.1億枚，總面值超過1.2億元，足見市民反應熱烈。銀行界亦開始研究，能否參照神沙車落區模式，為分行網絡覆蓋不足嘅地區，提供流動車銀行服務，認真具創意。