馬王即係馬王！有黑衣巨人之稱的本地一哩王「步步友」，上季尾遠征英國，在雷神胯下鎩羽而歸，回港後一直唞而不戰，這天選擇在第九場1200米二級賽精英碗復出，結果黑衣巨人重顯巨人本色。
「步步友」季內初出狀態未夠，雷神不騎，改配田泰安14檔起步，負133頂磅，刻意留後，等直路同對手鬥爆一段後勁，卒之最後百幾米至見影之「步步友」，如入無人之境，三兩個箭步已經趕過於內欄突圍的韋達座騎「大運財」，小勝半身位，但實質姿態無敵，其後勁無馬能擋，看出級數的分別，羞辱一短途馬，捧走精英碗，獨贏有10倍，係此駒在港贏馬以來最冷一次，組合獨贏開最熱嗰瓣A2，每注只派19.5元，人馬累積合作四戰三冠一季，大摩亦重拾盃王本色。
「步步友」不計英國之役，在港跨季近七戰贏晒，總獎金五千四百幾萬，應屆馬王繼續發光發熱。上屆精英碗由「友瑩格」勝出，此駒今場大熱倒灶大包尾。
韋達這天一直食齋，「大運財」留放一絕，最終不敵馬王「步步友」做二奶無話可說，第三名由雷神座騎「幸福指數」拎到，第四名係摩廐另一駒「一寶」，四重彩派三萬七千幾。