富商劉鑾雄（大劉）得寵女友陳凱韻（甘比）御准為大劉生下一對仔女，上周五是大女劉秀樺（Josephine）嘅7歲生日，噚日讀者梁太透過本報「爆相爆片」，透露甘比為囡囡喺金鐘亞洲協會搞咗個豪華型生日派對。現場所見，入口處掛上「Josephine」名字嘅氣球，主人家安排咗十幾張枱招呼賓客食自助餐，仲請埋老友徐濠縈同囡囡康堤、何超欣等都有出席。
吹氣滑梯招呼小朋友
甘比喺場內四圍走招呼朋友，而大劉就多數時間坐定定喺度。而場內除咗有動物公仔的氫氣球外，仲有一個超巨型嘅吹氣大白鯊滑梯、波波池、遊戲機、攤位遊戲、同埋電動火車，十足嘉年華會一樣。小朋友個個都玩得好開心，而佢哋走嗰陣仲有一大袋禮物收，不過已經11歲嘅康堤似乎唔係太啱玩，望一望冇攞禮物就走。
當日大約4點幾，着住背心裙、腳踏5吋高踭鞋嘅甘比走出門外送賓客離開，當中仲見到甘比搭住何超欣膊頭，表現老友。之後大劉、甘比同一對仔女喺保鑣護送下，乘坐「I LOVEU2」車牌的豪華Van離開。
