一年一度、由中環大業主置地舉辦嘅「鼠戰中環」噚日舉行，今年仲要去到第10屆。港交所（388）原來係呢項比賽嘅鐵腳，由2006年第一屆開始，一直有搵員工組隊參加，噚日亦唔例外，港交所員工以德國啤酒節嘅啤酒男郎作為造型，參加團體賽（8人一隊），贏得亞軍，冠軍係怡和飲食。
鼠戰中環最大特色，就係參賽者以不同造型落場比賽，今年有花仙子、美國隊長、龍珠，仲有近年大熱嘅黃色公仔Minions等等。港交所代表以啤酒男郎造型示人，不過呢個造型相比其他隊伍，好似普通咗些少，顏色又相對沉實，唔係一眼望見就知佢哋扮乜東東。
佢哋今年搵來監管合規部主管關蕙參加專為高級行政人員而設嘅「鼠王爭霸戰」，關蕙都係志在參與，玩番餐，輸咗都冇所謂啦！
