呢期政圈不時傳出鄉議局前主席劉皇發病重，失蹤多時，有讀者報料，話劉皇發9月底入過醫院做大手術。
八方問過劉皇發囝囝、即係𠵱家嘅鄉議局主席劉業強，佢話老竇嘅健康確曾出現問題，主要係腳痛，行起路上嚟好辛苦同無力。佢證實發叔入過醫院接受治療，但強調已經出咗院，正在康復階段，腳痛係減輕咗，但復原進度比較慢，𠵱家都要做物理治療，但思維仲好清晰，一如以往咁精靈。到底發叔接受過乜嘢手術同治療？強仔就無可奉告，因為都關乎病人私隱。八方聽聞雖則發叔休養當中，但都不忘跑馬仔呢個嗜好，除咗10月1日入過馬場，喺屋企都會睇吓跑馬仔㗎。