睇開報紙都知A1就係港聞頭條，通常就係成份報紙被認為最緊要嗰段新聞。這天沙田日馬，A1亦都茲事體大，事關呢個「組合獨贏」投注代號，做咗馬迷贏錢扶手棍，跑到第七場，已經開咗四次A1，即隔晚最熱組合。
到了第八場1600米二級賽沙田錦標，更加開出A1組合成員Q，情況同第二場由首次熱門「發盈喜」同「再開心」包辦大熱Q如出一轍。
呢場本地二級賽由大熱「詠彩繽紛」在雷神胯下守第二位，直路彈出帶到底，以四分三身位勝出，單win派20元正，A1組合獨贏則只得12.5元派彩。郭能策次熱「美麗大師」姍姍來遲後上跑第二，呢條大熱連贏有3.4倍，三、四名分別係半冷「軍事出擊」及大冷「美麗之星」，四重彩派五千二百幾。
其中前馬王「軍事出擊」英雄遲暮，衛冕沙田銀標宣告失敗，相反大熟當打之「詠彩繽紛」與雷神人馬合作5次未逢敵手。「詠彩繽紛」出道兩季累積11戰8冠1亞，近兩場連勝1400米G3慶典盃同1600米G2沙田錦標，累積獎金增至約980萬，趨近1000萬大關，年尾國際賽幾難唔預佢一份。
跑到呢場為止，雷神今季已贏33win一枝獨秀，比起二至四位騎師韋達、郭能及潘頓加埋仲要多三win，衛冕形勢大好。