【灣仔】現年53歲嘅何超瓊（Pansy）同商台高層兼密友、61歲嘅俞琤不經不覺已經交往咗五年幾喇！佢哋經常出雙入對，行街睇戲去旅行。噚日超瓊同俞琤又孖住去shopping，仲約埋幾個知己好友，包括李嘉誠紅顏知己周凱旋，一齊去到灣仔星街45R掃貨。45R係一間走高檔路線嘅日本著名潮店，以崇尚大自然、選料精細用全天然物料同人手製作打響招牌，所以有好多日本通都會識得呢個牌子，但係就一啲都唔平，一條裙閒閒哋都三千蚊落樓，唔係普通人可以負擔得起，咁佢哋呢幾位有保鑣護駕嘅名人闊太就梗係冇問題喇！
前後腳閃人
大約喺下午2點幾，俞琤同周凱旋及另一友人加埋兩個保鑣出現，超瓊隨後就到，等齊人之後入去45R，兩個保鑣企喺門口把守，情況就好似封舖咁樣，冇人敢行入去，咁喺舖頭入面四個人嘻嘻哈哈，Pansy獨自揀衫，俞琤就穿插喺周凱旋等一班女人堆中，不停畀意見，好似做咗周凱旋形象指導咁，為佢提供最專業嘅意見。
揀到咁上下，又再多一個司機同保鑣出現，總共係四個大男人企喺舖頭門外，等到佢哋大手買入幾袋衫之後，司機同保鑣就將啲衫放喺車尾箱，佢哋喺45R搞咗半個鐘，周凱旋先行離開，再過多陣，終於佢哋終於發現有記者，另一個朋友又走先，留番Pansy同俞琤喺舖入面，可能佢哋唔想咁高調，特登前後腳離開，Pansy就自己走先，15分鐘後俞琤先再坐車走。
採訪、攝影：朱志聰、徐錦池