無綫前新聞主播、6呎1吋高的葉昇瓚，離開大台即動作多多，繼早前接受雜誌訪問大爆料後，昨日又在太太陪同下現身尖沙嘴The One舉行的「杯緣子大挑戰」活動，同場的Super Girls（SG）、少女標本的許雅婷（Kabby）和袁紫僑（Coco）及台灣女星簡廷芮，被安排在一個大型有耳杯上鬥擺甫士，葉昇瓚負責做評判，結果由SG的Aka以摺起身體甫士奪冠。現場發生一段小插曲，SG和少女標本的粉絲混集在一起，尾聲時雙方發生衝突，爆粗鬧交，不過兩隊組合卻堅稱自己的粉絲好乖。
「我只識揸住個波」
男神主播平時報新聞一臉認真，但現場所見卻不失幽默一面，司儀問他有否做運動時，葉昇瓚笑說：「唔好以為我咁高識得打籃球，其實我只識揸住個波。」他透露還有兩星期自由身：「11月2號開始返財經公關公司，新工一至五，8點半至6點，多咗時間陪屋企人，個女4個月大，唔想錯過。」他強調離開無綫和任何人或公司無關，只是想轉環境及放多些時間陪家人。
無綫新聞主播多是非，新聞及資料部總監袁志偉不滿葉的髮型，召黃紫盈替報新聞，因黃紫盈趕不及改由張文采頂上，但最終還是黃紫盈接手，不過就淚灑鏡頭前。問到葉昇瓚現時的髮型是否當初被嫌棄的造型？他笑說：「呢個髮型更加唔出得街，返唔到工。因為有唔同規矩，我都明白嘅。」他指該髮型是公司髮型師為他定的。是否感覺冤枉？他說：「其實我自己當時冇為意呢樣嘢。」又指不覺袁志偉古板：「佢有唔同style去做，有唔同主張，都要尊重番佢。」他指主播之間其實好和諧，認真工作。他亦不相信因為集體署名一事被秋後算賬，只是同一時間太多人離開，才令人有此聯想。
葉昇瓚表示若有機會希望可以再復出幕前，可以和更多不同的人接觸。問到會否再爆料？他笑說：「已經爆咗好多喇！」他並笑謂陳珍妮已經爆了很多料，自己沒補充。
採訪、攝影：卓寶花
