「忘掉種過的花，重新的出發，放棄理想吧。」點解一個韓國歌手，唱廣東歌會令大家咁感動呢？可能唔係因為嗰三分半鐘好唔好聽咁簡單，而係你feel到佢背後苦練三個半月嘅誠意！
四年前，有位香港仔飛去首爾，為咗感動韓國嘅籃球界，神高神大嘅佢放低原本喺香港嘅籃球事業，逐間大學去敲門，為嘅係一個夢想成真嘅機會！四年後嘅今日，佢距離夢想只係一步之遙，喺聽日嘅韓職聯選秀會入面，周健宏（圖）有機會成為第一個喺韓國打職業嘅香港球員。難怪人人話去韓國返嚟都唔同咗樣，喺我眼前嘅肥宏，據講細個係大肥仔，家陣「弗」過金鐘國；又有人話佢以前係少爺兵，又懶又壞，但面前嘅佢禮貌周周，笑容滿面；連髮型都唔同咗，一個月前fb上面係G-DRAGON頭，因乜家陣變咗櫻木花道個skin head咁薯？
肥宏每日schedule要練四課，香港嚟講一個禮拜練到四課已經好專業啦。
「第一課係朝早六點？唔係吓話，天光未？」
「未㗎，大家一擘大眼就落去田徑場跑步！先跑10個400米，每個圈要喺1分20秒內跑完！」
「咁仲有三課又練乜呢？」
「10點嗰課喺球場練走位步法戰術，下晝先有波練，晚飯後仲有一課！」
「last堂有得舒服啲，鬆吓筋嘞啩？」
「教練會話你知當日有乜做得唔夠好，呢堂要做番好啲，跑得慢嘅獎你再跑10K，射唔準嘅射多300球，所以晚晚都好好瞓。」
練波都已嚇死各位港孩，大家可能唔明肥宏點解咁辛苦嘅路都肯行，或者當聽日佢戴上頂選秀成功嘅cap帽，大家就咩都明晒。「終須會時辰到，別怕！」
KEYMAN
節目主持