散打女騎馬人露背裝去Ball搶晒鏡

散打女騎馬人
露背裝去Ball搶晒鏡

剛周五晚「花月春風」馬主包大偉,在灣仔君悅酒店舉行一個名為Hollywood Goes To The Races的慈善舞會,為非牟利機構「香港樂童行」(The HUB Hong Kong)籌款。
舞會的主題衣著是黑呔,大部分男賓客都有跟隨衣著指引。馬會CEO應家柏伉儷有出席外,圈中多位騎練和馬主都鼎力支持,包括告東尼夫婦、莫雷拉同太太,以及大摩、郭能等。馬主方面,就有「淳綵」嘅靚仔王經緯、「寶成福星」新婚夫婦蕭煒忠同嬌妻、「帶寶來」嘅王家揚及勁索女友Christine、「友瑩格」嘅楊毅等,連曾係散打冠軍嘅女騎馬人王麗銀亦有參與,佢仲穿露背裝,同平時騎馬形象大有分別,與Christine、雷神嫂等美女一樣咁搶鏡。慈善舞會延開37席,連荷里活女明星Heather Graham都有到場支持。
包大偉是澳洲人,但非常關心香港貧窮兒童問題,「香港樂童行」喺深水埗有會址,服務基層小朋友,提供課餘補習等活動。所謂好心有好報,包大偉嘅「花月春風」及「風花雪月」,將出戰周日(25日)之沙田錦標及精英碗。其中「花月春風」曾經三次角逐冠軍一哩賽,得一冠兩季全上名,一哩實力有幾勁毋須多講,均速馬仲要加埋個一檔,包大偉隨時做完善事就有得捧盃。