號稱好打得嘅政務司司長林鄭月娥在立法會會議反擊泛民議員將「啟晴邨鉛水事件」泛政治化，指責在地區居民大會上，有區議員要求官員飲「鉛水」，令官員受屈辱，佢已發出指令，以後官員出席公眾場合，要維護的「不單個人尊嚴，是特區政府的尊嚴」，又指自己：「官到無求膽自大，有膽量承認制度不足，亦有膽量指鉛水被政治化。」
好一句「官到無求膽自大」。此句應源出於「人到無求品自高」一詞，清代名家紀曉嵐老師陳伯崖一對對聯：「事能知足心常泰，人到無求品自高。」上聯未必有人識，下聯就傳到街知巷聞，諗深一層，何謂「知足」，何謂「無求」，甚富爭辯性，故此心難常泰，品難自高。記得左丁山比較年青時，不能受氣，轉工係慣事，有一次小女讀中二中三，擦爸爸鞋：「爸爸不為五斗米折腰」，左丁山聞言大悅，正想錫佢一啖，點知讀小學嘅小兒竟然多口加咗一句：「有五十斗米，一百斗米，你折唔折腰呀？」左丁山為呢句說話，諗足成晚，幾乎失眠。
年紀大咗，見到不少人自政府或大公司退休後，又爭住入私人機構做新工，做到年過70咯，又去做大財團屬下公司主席諸如此類，方知知足、無求係十分艱難之一回事，過往英國官員自港英政府退休就返英倫，自此寂寂無聞，當今不少高官退休，竟要尋求第二春，爭取曝光度，故左丁山十分欣賞國家前副總理吳儀，一聲裸退，自動消失於眾人眼前，吳儀先至係「事能知足心常泰，人到無求品自高」嘅典範。林鄭月娥講完，「官到無求膽自大」，有人立即解讀，係順便講俾極想連任嘅梁老闆聽嘅，公開在立法會如此說，自殘民望，老闆聽咗就放心嘞，起碼少咗一位勁敵，以後對佢會放心的，唔駛左眼望住政務司司長，右眼又要睇住財政司司長吖！最緊要係「官到無求」，至於膽大唔大，無關重要。但係呢，林鄭女士後來出席胡百全律師樓70周年酒會致詞，一位商界人士轉告，當日梁振英不在港，林鄭以署理行政長官身份出席，佢竟然講到As Chief Executive, I....，當場引起哄動，點解冇Acting呢個字在前嘅？呢位商人對左丁山講「官到無求？心思思，Freudian slip出現咗嘞。」是耶非耶，我地難以理解。