若你也喜歡留意國際局勢，應有同感，近代英國係最擅長搶飲頭啖湯。第一個對中國開戰嘅西方國家係英國，第一個同中華民國斷交嘅歐洲國家係英國，第一個加入亞投行嘅歐洲大國係英國，第一個想借人民幣國際化做人民幣離岸中心嘅歐洲大國，都係英國。
習近平訪英，雙方簽署近400億英鎊貿易投資協議，內地媒體鋪天蓋地引述英國首相卡梅倫指中英雙方進入黃金時代一語。一個現實情況，金融海嘯後縱然印咗六年銀紙，全世界經濟仍然唔好，而且低利率行得太耐，好多金融範疇都冇肉食。作為全球舉足輕重嘅金融中心，英國太需要喺呢個時候搵有油水嘅業務振興經濟。眼下最有潛力搵大油水嘅業務就係人民幣國際化，無論成功與否，做嘅過程中都有錢搵，對中國而言，此為天時。
英國作為美國傳統盟友，亦係歐盟內唔用歐元嘅經濟大國，呢種獨特國際地位決定咗，當中國成功拉攏英國，同美國歐盟就容易有偈傾。2017年英國將要公投是否退歐，對英國而言，中國生意搶先嚟做，再談退歐起碼手中有籌碼；對中國而言，借道英國嘅獨特地位可以拉近與美歐關係，亦可令美歐對中國事務上多一層顧忌，此為地利。
今日講政治、講商業經常會聽到一句沒有永恒嘅敵人，只有永恒嘅利益，呢句話出自十九世紀英國首相Lord Palmerston：“We have no eternal allies, and we have no perpetual enemies. Our interests are eternal and perpetual, and those interests it is our duty to follow.”
Lord Palmerston就係鴉片戰爭發動者。英國人出名實際，順時而行，見到勢頭唔會講多餘說話，立即就轉。因此可以見到無論搞海外人民幣債券定亞投行，中國都知道要先從英國入手，此為人和。
值得留意嘅係，習近平今次訪英屬單獨行程，唔同以往同時出訪多個國家，意思係專程拜訪；英國亦響103下禮炮迎接，有別於一般國家響21下禮炮歡迎國家元首嘅慣例，雙方都以高規格隆重其事。其中關鍵恐怕就係人民幣11月能否加入SDR一事。SDR納入人民幣要IMF 70%成員國支持，美國同日本兩國已佔22.97%投票權，而英國佔4.29%（詳見表）。此三大盟友國如果都反對SDR納入人民幣，11月嘅審議人民幣就凍過水，所以習近平今次喺SDR投票前落區拉票。你冇睇錯，國際事務上，中國係要跟民主投票規則。
另外要提一提近日人行突然大動作，先用MLF放水1,055億人民幣後，隔兩日又減息降準，明顯為紮馬做準備。聯儲局10月27至28日議息，10月議息冇記者會，加上狼來了太多次市場越來越冷淡。但人行突然大動作令人諗起今年1月時，瑞士知道歐洲落實要QE，拿拿臨將瑞郎同歐元脫鈎。人行大手注入流動性紮馬，有機會係下星期美國開始加息。
Mr. Tregunter