青春電影當道，先有台灣電影《我的少女時代》，再有黃修平新作《哪一天我們會飛》，都是販賣青春提供集體回憶恩物，童話背後略欠一份真實。自言「前世作孽，今生寫字」、編劇出身的陸以心導演的首作《同班同學》，找來彭浩翔監製，以情色為青春補白，裸露、粗口兼而有之。而他們選出的經典情色電影中，明顯有着男女有別的不同。
撰文：何永寧
早前電影《同班同學》的導演陸以心及監製彭浩翔為宣傳在中環一餐廳接受訪問。《同》片講述三個中學同班女學生在青春成長過程的遭遇，當中涉及色情裸露及粗口，不過相對彭浩翔跟陸以心合作的兩部三級前作《低俗喜劇》及《飛虎出征》當然駕輕就熟。
彭導最愛金碧辛嘉
電影以情色掛帥，從他們心目中經典的情色片，亦看出導演及監製在感情上的分野。彭浩翔認為金碧辛嘉跟米奇洛基在86年主演的電影《九個半星期》是情色片之最，他說：「好記得有一幕米奇洛基約咗金碧辛嘉返屋企，金碧辛嘉去到見到張床鋪到好靚，擺明知道米奇想同佢上床，佢即轉身走咗。所以情慾唔一定冇着衫，《九個半星期》個意境好高。睇完之後我有好長時間都想經歷呢類『鋪床』場面，當然最好要有金碧辛嘉咁靚。」彭浩翔覺得在《同》片內亦有一場相類似的戲份引人遐想：「其中一場講三個女仔同住時，廖子妤搵唔番佢條衞生棉條，麥芷誼幫佢撩入去搵嘅過程令佢產生高潮，其實場戲冇嘢睇，但就好挑逗。」
反而在女性的角度，陸以心比較看重靈性方面，在她眼中法國電影《浪漫情色》是情色電影的經典：「劇情講女主角雖然好愛佢男朋友，但滿足唔到佢，女主角要出去搵另一啲人玩SM，淒美嘅地方係兩個人唔可以靈慾一致，《同班同學》亦有一場類似戲份。郭奕芯鍾意嘅係班中一位男同學，因為一啲原因兩個人冇一齊，最後佢嘅初夜畀咗王宗堯。」
陸以心爆被擺上枱
陸以心在寫專欄時曾自嘲「前世作孽，今生寫字」，想不到更慘的是居然要當起導演，她笑言是被老闆彭浩翔擺上枱，她說：「開頭只係寫劇本寫完老闆話不如你拍埋啦。」在旁邊長時間閉目養神的彭浩翔忽然說：「有乜嘢好得過寫嗰個拍番。」陸以心表示既然一世人第一次做導演，就要做自己想做的事：「所以要做就做到盡，援交、裸露都要有，華語片有個特色，裸露就等同性愛，其實好多時啲女仔喺屋企都係冇着衫行來行去，唔一定有性。好多時將女仔裸露就等同上床，男仔唔着衫就陽光，我覺得女仔都可以。如果你話要似邊部港產片，我會話喺《香蕉成熟時》嘅少女版。」
