經民聯喺政改投票甩轆後，林健鋒（Jeffrey Lam）一直好低調，昨64歲正日生日，黨友就喺立法會為佢慶祝，正好為Jeffrey沖喜，佢為咗等埋發叔搞出大頭佛，但噚日切蛋糕就唔再等埋發叔，因為發叔攞咗假囉！
噚日開完內務委員會後，Jeffrey就邀請八方同埋一眾記者陪佢切蛋糕，當然唔少得佢班黨友梁君彥、張華峰、盧偉國同石禮謙。不過返咗內地講書嘅梁美芬同埋發叔就唔見人。
石禮謙相當唔話得，拎咗一支1962年、價值過萬嘅砵酒與眾同樂。Jeffrey今年生日蛋糕整到好以高爾夫球場咁，寓意佢可一桿入洞，切蛋糕前，八方多口問句唔使等埋發叔咩？佢冇聲出。算，衰嘢都係唔好再提喇！
立會秘書處︰發叔請咗假
除咗黨友，建制派姚思榮、馬逢國，一知道噚日係Jeffrey牛一，都專程走過嚟賀佢，而Jeffrey位公子亦相當識做，噚日踏入凌晨就即發短訊賀壽，仲約埋佢噚晚一齊食飯，相信佢都心滿意足。
至於冇出席嘅發叔，自從立法會復會開始就冇現身咁滯。八方向立法會秘書處查詢，佢哋話發叔已請咗假，至於乜事請假、請咗幾耐，就要留番發叔親自交代。喺度八方同樣衷心希望發叔身體健康。
李八方
mailto:[email protected]