又有新一屆懲教署職員訓練院嘅學員畢業！噚日係佢哋結業會操，有27個懲教主任同68個二級懲教助理完成23周入職訓練。今屆得13個女學員，其中24歲嘅二級懲教助理尹炩心（圖）仲攞埋「金笛獎」㖭。佢話女性做懲教絕對唔輸蝕，「反而女仔會細心啲，更了解在囚人士嘅需要」。佢又形容自己性格活潑好動，做掌上壓、引體上升毫無難度，目標係令社會「多一個好人，多一份安全」。
最近煩緊七警案嘅律政司司長袁國強做主禮嘉賓，佢致辭時話，法治係香港核心價值，表揚懲教人員為司法體系把關。不過佢冇答記者問題，話「今日唔講嘢啦」就急急腳走咗。