利物浦球迷等了又等，都仲未等到領隊高路普（右二）領軍下嘅首勝，周四歐霸盃分組賽主場對魯賓卡山，雖然對手36分鐘已經有隊長古斯文「兩黃一紅」被逐，紅軍都只係靠安利簡恩近門建功，逼和1:1，B組連和三仗。
英超球隊踢歐霸盃往往都以副選為主，不過高路普就一反常態，正選陣容好似菲臘比古天奴、占士米拿、米洛列特等等都係常規正選，只有中場祖阿倫算係副選球員，但強陣下紅軍竟然先失波，12分鐘走甩馬高迪維，俾呢位前鋒先開紀錄。不過魯賓卡山後衞古斯文未夠上半場已經兩黃一紅被逐，利物浦把握多踢一人優勢，先由安利簡恩追和，但喺下半場唔爭氣，無辦法再入波，結果又係和波收場。好彩紅軍都有好消息，前鋒史杜列治已經傷癒，可以喺聽日對修咸頓呢場聯賽復出，加上比利時中鋒賓迪基今仗亦後備上陣，兩大前鋒壓陣，紅軍要拎三分真係指日可待。
德國領隊高路普繼續係呢場焦點，安利簡恩追和一球，又見到呢位熱血教頭振臂高呼；雖然佢接手之後講過唔會向舊東家多蒙特挖角，但可能帶咗紅軍兩場，覺得中場唔多掂，就傳出佢一月想搵踢過紅軍嘅多蒙特中場紐尼沙軒過檔。